O mundo secreto de Basilius Hoffman 2. Un faro na escuridade

                                  
Título:         O mundo secreto de Basilius Hoffman 2. Un faro na escuridade
Autor:          Fernando M. Cimadevila,  ilustrado por Iván Valladares
Lugar ed.:    Santiago de Compostela
Editorial:     Urco
Ano ed.:      2012

Existe un lugar perdido no profundo da noite, unha cidade secreta sen casas nin edificios, só tellados, azoteas, faiados e chemineas, bufardas, campanarios, torreóns… A Cidade dos Tellados non ten rúas, só pontes e pasarelas, tubaxes e escaleiras que sortean o nebuloso mundo que existe baixo a súa superficie. Un segredo, tan antigo como o propio mundo, ocúltase tras este labirinto insondábel, pero para descubrilo, o profesor Basilius Hoffman e o seu sobriño Peter deberán enfrontarse á máis profunda escuridade, aquela que habita no noso interior.

Regresan as aventuras do profesor Basilius Hoffman: historiador e arqueólogo de mundos ocultos, cabaleiro a tempo parcial e truán a xornada completa. Nesta ocasión a súa procura do lendario Diario do Cartógrafo levarao a descubrir novos e misteriosos lugares, abraiantes inventos alquímicos, inquietantes criaturas, e tamén a desenterrar escuros segredos que nunca deberían ver a luz.

O mundo secreto de Basilius Hoffman 1. O ladrón de soños

                               
Título:        O mundo secreto de Basilius Hoffman1. O ladrón de soños
Autor:         Fernando Cimadevila Botana
Lugar ed.:   Santiago de Compostela
Editorial:     Urco
Ano ed.:      2010

A colección “O mundo secreto de Basilius Hoffman” reúne as novelas de aventuras do compostelán Fernando M. Cimadevila sobre o arqueólogo Basilius Hoffman e o seu sobriño Peter, buscadores de segredos ocultos e cazadores de mitos esquecidos.

Achégase unha nova Era, as antigas portas féchanse definitivamente, os reinos que durante séculos lindaron as fronteiras do noso mundo esvaécense entre as brumas das lendas. Durante anos o profesor Hoffman, explorador de mundos ocultos, dedicou non poucos esforzos a desvelar os seus segredos. Mais só cando o seu sobriño Peter chega ao vello casarón Hoffman para pasar as vacacións de Nadal, o destino une as súas vidas dando comezo así á batalla definitiva na que se porá en xogo o noso ben máis prezado: o poder da imaxinación.

Aquí comeza a saga do profesor Basilius Hoffman: historiador, arqueólogo, cabaleiro a tempo parcial e truán a xornada completa. E a súa viaxe na procura do lendario Diario do Cartógrafo, na que descubriremos cidades perdidas no profundo da noite, sociedades secretas, misteriosas criaturas, poderosas reliquias sagradas, imposíbeis aparellos mecánicos e unha infinidade de curiosos personaxes.